ئومێد بابان

به‌ درێژایی 100 ساڵی رابردوو، حكوومەتە یەك لە دوای یەكەكانی عێراق، هیچ كات وەك هاوبەشی سەرەكی و دووەم گەورەترین نەتەوە لە عێراقدا، مامەڵەیان لەگەڵ خەڵكی كوردستاندا نەكردووە و هەمیشە وەك ژێردەستە و هاووڵاتیی پلە دوو، لە كوردستانیانیان ڕوانیوە.

عێراقییەكان، بەوەندەشەوە نەوەستاون، كۆمەڵكوژ و كیمیاباران، ئەنفال و زیندەبەچاڵیان كردووین و بە رۆژی رووناك و بە بەرچاوی كۆمەڵگای مرۆڤایەتییەوە، ستەمی زۆر گەورە و نامرۆڤانەیان دەرهەق بە گەلی كورد كردووە و بوونەتە مۆتەكە و بەربەستی سەرەكی لە بەردەم پێشكەوتنی نەتەوەیەكی زوڵملێكراوی بە ناحەق چەوسێندراوەدا، كە تەنانەت لەبەر كوردبوونمان، ژیانیشیان پێ رەوا نەبینیوین و شەلم كوێرم، ناپارێزم، كەوتوونەتە گیانی خەڵكی سڤیل و ئەگەر پێشیان نەكرابێت بمانكوژن، راستەوخۆ و ناڕاستەوخۆ، شەڕی دەروونییان لە بەرامبەرماندا راگەیاندووە.

ئەوان، وەك هەمیشە چێژیان لە رووخان و ئازاردانی تاكی كورد وەرگرتووە و شۆڤێنیانە، بە ئاگر و ئاسن وەڵامی داوا و خواست و ویستە رەواكانی گەلی كوردیان داوەتەوە و قەت رۆژێك لە رۆژانیش دانیان بە كۆی ئەو تاوانە گەورە و نائینسانیانەدا نەناوە، كە بەرامبەر میللـەتێكی زیندووی خاوەن زمان و كلتوور و فەرهەنگی جودا، ئەنجامیان داوە. لەوەش زیاتر، لە هەموو بارودۆخێكدا، بە جیاوازیی ئایین و ئایینزا و ئایدۆلۆژیاشەوە، یەكیان گرتووە و خەونی نەزۆكیان بە كپكردنی دەنگ و رەنگی كوردەوە بینیوە و بە بچووكترین شكستی كورد، شاگەشكە بوون.

لە عێراقی عروبەدا، كە فۆڕمی پێكدیهەڵنەكردن و ناتەبایی و ناكۆكی لەسەر داواكردنی مافە سەرەتاییەكانی نەتەوەیەك، لە دوای 2003وە ڕەنگی دایەوە، حوكمڕانییەكی ناهاوبەشی لێ كەوتەوە، كە بە هۆی بێباكی و خۆپەرستی و داردەستیی سەركردە سیاسییەكانی عێراقەوە، كورد لە كۆی كایە جیاوازەكاندا پەراوێز خرا و كرایە قۆچی قوربانیی دروشمی سەر كاغەزی (فیدڕاڵی و دیموكراسی و ئازادی و فرەیی).

بە كورتی، ئەوەی ئێستا لە پەرلەمانی عێراق سەبارەت بە پشتگوێخستنی كورد و تێپەڕاندنی یاسای پارەداركردنی كورتهێنانی دارایی بێ نوێنەرانی خەڵكی كوردستان روودەدات، شتێكی نامۆ نییە و درێژكراوەی ئەو زهنیەتە شۆڤێنییەیە، كە حوكمڕان و قەڵەمبەدەستەكانی بەغدا فرچكیان پێوە گرتووە و دەشكرێ بڵێین، دووبارەكردنەوە و سەپاندنی ئەو دیكتاتۆرییەتەیە، كە لە خەیاڵدانی سەركردە سیاسییەكانی عێراقدا جێگیر و نەگۆڕە، بەو واتایەی، دەسەڵاتدارانی بەغدا، هەمان نەهج و پیلانی رژێمە سەركوتكەرە داپڵۆسێنەر و ستەمكارەكانی پێش خۆیان پەیڕەو دەكەن.

دوور نەڕۆین، لەو كابینانەی حكوومەتی عێراقدا، كە كورد ئومێدی لەسەر هەڵچنیبوون تا عێراقی نوێ لە سایەی دەستوور و یاسا و رێسا نێودەوڵەتییەكان بنیات بنرێت و دەبوو هاوبەشی راستەقینە و سەرەكی و خاوەن بڕیاریش بێت، كەچی مووچەی هاونیشتمانیان بڕدرا، هێرشی سەربازی كرایە سەر هەرێمی كوردستان، هەوڵی لەباربردنی كیانە دانپێدانراوە دەستوورییەكەی درا و تا دوایی..

هاوكێشەكە روونە، دەبێ لەمەودوا سەركردایەتیی سیاسیی كوردستان لەوە حاڵی بن كە نە شیعە و نە سوننەی عەرەبیش، خێروبێریان بۆ كورد نییە و تەنانەت ئەگەر بۆیان بلوێت، ئامادەن بە ئاماژەیەكی ئیقلیمی، كۆی ئەو ئەزموونەش لەبار بەرن، كە بە ساڵەهای ساڵی ڕەنج و خەباتی شاخ و شاری تێكۆشەران و بەخشینی خوێنی هەزاران شەهید لە پێناو ئازادیدا، بەرهەم هاتووە.

بخوازین یان نا، دەرفەتێك بۆ كورد هاتووەتە پێشەوە، تا لە رێگەی بایكۆتی پرۆسەی سیاسیی عێراق و گەڕانەوە بۆ هەمەجۆركردنی داهات و پشتبەستن بە بەرهەمی ناوخۆ و چاكسازی و پاكسازیی راستەقینە و بەخشینی زۆرەملێی پارەی ئەو بەرپرس و بازرگانانەی لە سایەی حكوومەتی هەرێمدا لە هیچەوە بوونە ملیاردێر، پشت بە خۆی ببەستێت و چیدی چاوی لە عێراقی شكستخواردوو نەبێت قوتی هاونیشتمانیانی دابین بكات.

ئێستا، كاتی بەخۆداچوونەوە و وەرگرتنی هەڵوێستی جددی و یەكدەنگی و یەكگوتاریی حزب و لایەنە سیاسییە كوردستانییەكانە بەرامبەر بەغدا، بەغدایەك كە تا سەر ئێسك، مایەی نەهامەتی و بەدبەختی و دەردەسەرییە بۆ كوردستان.


Like it? Share with your friends!

Comments

كۆمێنت

Choose A Format
Personality quiz
Series of questions that intends to reveal something about the personality
Trivia quiz
Series of questions with right and wrong answers that intends to check knowledge
Poll
Voting to make decisions or determine opinions
Story
Formatted Text with Embeds and Visuals
List
The Classic Internet Listicles
Countdown
The Classic Internet Countdowns
Open List
Submit your own item and vote up for the best submission
Ranked List
Upvote or downvote to decide the best list item
Meme
Upload your own images to make custom memes
Video
Youtube, Vimeo or Vine Embeds
Audio
Soundcloud or Mixcloud Embeds
Image
Photo or GIF
Gif
GIF format