meko itech1

یونس قادر

خۆشبەختی یەكێكە لە ئامانجە باڵاكانی ژیانی مرۆڤ، هەربۆیە هەموو مرۆڤەكان هەوڵدەدەن بێ جیاوازی پێی بگەن. بەڵام ئەوەی تێبینی دەكرێت،

 راستیی و راستیی خۆشبەختی بەلای هەریەكەمانەوە جۆرێكە، هەندێكمان پێمان وایە راستیەكەی ئەوەیە كە ئۆتۆمبێلێك و خانوویەكت هەبێت،

 گەیشتن بەم ئامانجەش، بەدیهێنانی كۆتایی خۆشبەختییە، بەڵام راستییەكەی كە بەم ئامانجەش دەگەین، هێشتا هەست دەكەین خۆشبەخت نین،

 چونكە لەسەرەتاوە بە هەڵە دادوەریمان كردووە و ئەو رێگەیەی هەڵمانبژاردووە، رێگەی خۆشبەختی نەبووە، هێشتا هەر دەنگێك لە ناخماندا هەیە،

 پێمان دەڵێت هەڵەیەك هەیە و ئەو رێگەیەی پێیدا رۆیشتوویت، رێگەی راستی خۆشبەختی نەبووە، 

بۆیە دەبێت هێشتا هەر بگەڕێیت تاكو رێگە راستەكە دەدۆزیتەوە. لەدوای ئەمەشەوە دەگەیتە ئەو ئەنجامەی كە هەبوونی ئۆتۆمبێل و خانووش گەیشتن بە راستیی خۆشبەختی نییە،

 بەڵكو تەنها تراویلكە (سەراب)ێكە.
هەندێكی دیكەمان راستیی خۆشبەختی تەنها لە هاوسەرگیریی و هەبوونی منداڵدا دەبینێتەوە. هەندێكی ترمان لە خوداپەستی و پەیداكردنی ساماندا دەبینێتەوە. بەشێك لەم بۆچوونانە رەنگە هەڵە بن،

 بەشێكیشی رەنگە تاڕادەیەك راست بن.

 مرۆڤەكان بەشێوەیەكی سروشتی نایانەوێت ژیانی خۆیان لەسەر بنچینەی شتانێكی ناراست بونیاد بنێن، ئاخر بۆئەوەی كە ژیانیاكی واتاداریان هەبێت، 

هەمیشە هەوڵیان داوە راستیی شتەكان لە هەموو بوارەكانی ژیاندا بدۆزنەوە. راستیی خۆشبەختیش نەیتوانیوە خۆی لە دەستیان قوتار بكات، 

بۆیە تائێستا چەند راستیێك لەبارەی ئەوەی خۆشبەختی چییە،

 دۆزراوەتەوە، بەڵام بۆ ئەوەی زیاتر من ورد و بابەتیی بم، دەبێت بڵێم چەند پێدراوێك هەیە لەبارەی ئەوەی كە راستیی خۆشبەختی چییە،

 لێرەدا و لە خوارەوە یەك یەك باسیان دەكەم:

راستیی یەكەم: خۆشبەختی زیاتر قووڵ و درێژخایەنە وەك لەوەی تەنها خۆشییەك یان چێژێك بێت
خۆشبەختی لە رووی چییەتی و راستیەكەیەوە جودایە لەوەی كە تەنها هەر خۆشیی و چێژ یان لەزەتێك بێت،

 ئەم هەستانە هەموویان كاتیی و سنووردارن، پەیوەستن بە هۆكارگەلێكی نزیك و راستەوخۆوە،

 زۆربەی كات بەهۆی هەڵچونێكی هەنووكەییەوە روودەدەن و بۆیە توانای مانەوەی نییە و لەناودەچن. خۆشبەختی هەستێكی زیاتر قووڵ و درێژخایەن و فراوان و جێگیر و بەردەوامە. پەیوەست نییە بە تەنها 

رووداوێكی تیژپەڕ یان هەلومەرجێكی كتوپڕەوە. وەكو دەزانین ئەو كەسانەی كە ژیانیان زیاتر لە چێژ و لەزەتدا بەسەر بردووە، پەنایان بۆ خۆكوشتن یان جۆرەكانی دی لە هۆكارەكانی هەڵاتن بردووە.

راستیی دووەم: پەیوەندییەكی پتەو هەیە لە نێوان خۆشبەختی و ئەرێنیبووندا
پەیوەندییەكی وجودیی هەیە لە نیوان خۆشبەختی و ئەرێنیبووندا، بەشێوەیەك كە لە زۆربەی كاتەكاندا هەردووكیان لەگەڵ یەكتر رۆڵی بوون و عەدەم وازی دەكەن. سەرەڕای هەبوونی ناكۆكی لەسەر چەمكی

 خۆشبەختی لە نێوان مرۆڤەكاندا و جیاوازی پێناسەكەی لە روانگەی فەیلەسوف و زاناكانەوە، من هەوڵ دەدەم بڵێم، خۆشبەختی

 بە واتای كۆمەڵێك هەستی ئەرێنی دێت كە مرۆڤ تێیدا دەژی، وەكو هەستەكانی رازییبوون لە خود، ئاشتبوونەوە لەگەڵ ژیان،

 هەستی دڵنیابوون و متمانە و ئومێد و لێبوردەیی بەشێوەیەكی گشتی. جا بۆیە هەتا زیاتر كەسانێكی ئەرێنی و پۆزەتیڤ بین، شانسی خۆشبەختیمان زیاتر دەبێت.

راستیی سێیەم: هەندێك لەو شتانەی كە بە هۆكارەكانی خۆشبەختی دەزانین، رەنگە وانەبن
چەندان جۆری توێژینەوەی دەروونزانی،

 كە دەروونزانی پسپۆڕ لە زانكۆ بەناوبانگەكان لەبارەی خۆشبەختییەوە کردوویانە، توێژینەوەكانیان هەزاران كەسی كۆمەڵگە و چینەكان و وڵاتانی جۆراوجۆری لە خۆگرتووە، گەیشتوونەتە ئەو ئەنجامەی كە زۆربەی ئەو شتانەی كە ئێمە بەهۆكاری خۆشبەخی دادەنێین، رەنگە وانەبن، 

وەكو ئەوەی هەندێك فاكتەر هەیە كە رەنگە پشتگوێی بخەین، بەڵام كاریگەریەكی

 زۆری هەیە لە بەدیهێنانی خۆشبەختیدا. بۆ نموونە لەوانە، كە لە ئەنجامی ئەو توێژینەوانەوە بەدەستهاتووە، ئەوەیە كە كاریگەری پارە زۆر كەمە لە بەدەستهێنانی خۆشبەختیدا، دوای ئەوەی كەسێك دەبێتە خاوەنی ئەوەندەی بە لای كەمەوە كە پێویستییەكانی پێ دابین دەكات، ئیتر سامانی زێدە لە پێویستی تەواو، خۆشبەختی زیاتر بەدیناهێنێت، جگە لە رێژەیەك كە شایەنی باسكردن نییە.!
ئەو توێژینەوانە دەریانخستووە كە لە گرنگترین فاكتەرەكانی بەدەستهێنانی خۆشبەتی: خوداپەرستی، هاوسەرگیری، پەیوەندی كۆمەڵایەتی باش، جگە لەمانەش ژیان لە وڵاتێكی دەوڵەمەندی دیموكراسیدا بەیەكێك لە فاكتەرە كاریگەرە ئەرێنیەكان دادەنرێت لە بەدەستهێنانی خۆشبەختیدا.

راستیی چوارەم: خۆشبەختی لە خودی خۆتەوە دەست پێدەكات نەك لە دەرەوەی خۆت
راستییەك هەیە جەخت دەكاتەوە لەوەی،هەموو ئەوانەی كە لە توێژینەوەكایاندا باسی بابەتی خۆشیبەختیان كردووە، ئەڵێن: خۆشبەختی و بەدبەختی لەو ژینگەیەوە هەڵناقوڵێن كە دەوریان داوین، بەڵكو لە شێوازی روانینمان و مامەڵەمان لەگەڵ ئەو ژینگەیەدا دروست دەبێت. لەبەرئەوەی ئەگەر دوو كەس دانێین لە چوارچێوەی هەمان ژینگەدا، دەبینیت یەكێكیان خۆشبەختە، ئەویتریان لە ترۆپكی بەدبەختیدایە. ئەمەش واتای ئەوە دەگەیەنێت كە خۆشبەختی لە خودی خۆتەوە هەڵدەقوڵێت نەك لە دەرەوەی خۆت، لەبەرئەوەشە ئەوانەی كە بە دوای خۆشبەختیدا گەڕاون، زیاتر گرنگیان داوە بەوەی لە رێگەی كاریگەری بیركردنەوەی ئەرێنیبەوە بەدەستی بهێنن.

راستیی پێنجەم: ئەوانەی لە پێناوی بیرۆكەیەكدا كاردەكەن و سنوری خودی خۆیانی تێپەڕاندووە، ئەوانە زیاتر خۆشبەختن
ئەو كەسانەی كە دەیانەوێت واتایەك بۆ سەر ژیانیان زیاد بكەن، لە رێی بەها جوان و ئامانجە بەرزەكانەوە یان لە رێی كاركردن لە پێناوی بیرۆكەیەكدا كە سنووری خود و بەرژەوەندی كەسی تێپەڕاندووە، ئەمانە لەو كەسانە خۆشبەخترن كە تەركیزیان تەنها خستۆتە سەر بەرژەوەندییەكانی خۆیان، یان لەوانەی كە ژیانێكی بێهوودەیی و عەدەمی دەژیین. بەرزترین قۆناغی خۆشبەختی ئەو كەسانە بەدەستی دەهێنن كە دەتوانن نقوم بن لە ئارەزووە زانستی یان هونەریی و وێژەیی یان وەرزشی یان كار و چالاكییە خۆبەخشیەكانیاندا، بەشێوەیەك كە خۆیانیان بیر دەچێتەوە، بەهۆی ئەم نقومبوونەوە بەسەر هەموو هەستە نەرێنیەكانیاندا سەردەكەون.

راستیی شەشەم: رق و حەسوودیی و ئیرەیی خۆشبەختی لەناو دەبات
ئەوانەی ژیانیان هەمووی رق و حەسوودی و كینەیە، حەزدەكەن بەردەوامی بدەن بە ئارەزووی رقلێبوون و تۆڵەكردنەوە لە كەسانی تر، پڕ دەبن لە هەستی دوژمنكاری بەرامبەر كەسانی تر، رۆژەكانیان لە گرژی و تووڕەبوون و كەمئارامیدا بەسەر دەبەن، ئەوانە دوورترین كەسن لە خۆشبەختییەوە، ئەوانە لە هەستی حەسوودی و ئێرەییدا دەژین، دیقەتی راستیی هەستەكانیان بددە، شیكردنەوەیان بۆ بكە، لە رووی بەرژەوەندیی و ئەنجامەكەیانەوە، ئەوكات بۆت دەردەكەوێت كە ئەوانە هۆكاری بەدبەختییان دەگەڕێتەوە بۆ خۆشبەختی كەسانی تر، ئەوان ئەشكەنجەی خۆیان دەدەن بە ئازار و هەستی نەرێنی بەهۆی سەركەوتنی كەسانی تر جگە لەخۆیان. ئەگەر تۆزێك داناییان هەبووایە، خۆیان رزگار دەكرد لە بڵێسەی ئاگری هەستی حەسوودی و كەسانی دیكەش رزگاریان دەبوو لە تۆڵەی ئەو هەستە نەرێنییەی ئەمان.

راستی حەوتەم : دڵخۆشكردنی كەسانی تر گرنگترین سەرچاوەی خۆشبەختییە
ئەم راستیەیان، ئەو كەسانە دركی پێ دەكەن كە هەوڵ و تەقەڵاو و ماڵ و كاتیان لە رێگەی خۆشبەختی خستنە نێو دڵی ئەوانەی پێویستیان هەیە خەرج دەكەن، لە نەخۆش، یان هەژار، یان منداڵان یان بەساڵاچوان، یان ئەوانەی پێداویستی تایبەتیان هەیە. ئەم كەسە خێرخوازانە هەمیشە رازیبوون و خۆشی لەوەدا دەبیننەوە كە توانیوویانە وێنەی زەردەخەنەیك لە رووخساری نەخۆشێكدا بكێشن، یان نیگایەكی خۆشی لە چاوانی منداڵێکی مەحرومكراودا زیندوو بكەنەوە، هیچ هەستێكی خۆشی ناتوانێت هاوتای ئەم خۆشییە ببێت.
بەڵام گرنگە كە ئاماژە بەوەش بددەین كە خۆشبەختی گەورە لە دڵخۆشكردنی كەسانی ترەوە بەرهەم دێت، لە هاریكاریی و خزمەتكردنێكەوە كە پێشكەش بكرێت لە سۆنگەی ویژدانەوە، لە هەستی خۆشەویستی و رەحم و هەستكردن بە ئەركی ئینسانییەوە، لە تەقەڵا و هاریكاریی و خزمەتكردنیێكەوە بەرهەم نایەت كە لە بابی خۆبەباشتر زانین و منەتەوە بێت، یان لە بابی رییایی و حەزی خۆدەرخستن و داخوازی چاككردنی خەڵكەوە بێت.

سەرچاوەکان:
-1 المعاني السامیة، ابرهیم کشت، الطبعة‌ الاولی، عمان . 2010

meko itech1

Like it? Share with your friends!

Comments

كۆمێنت

Choose A Format
Personality quiz
Series of questions that intends to reveal something about the personality
Trivia quiz
Series of questions with right and wrong answers that intends to check knowledge
Poll
Voting to make decisions or determine opinions
Story
Formatted Text with Embeds and Visuals
List
The Classic Internet Listicles
Countdown
The Classic Internet Countdowns
Open List
Submit your own item and vote up for the best submission
Ranked List
Upvote or downvote to decide the best list item
Meme
Upload your own images to make custom memes
Video
Youtube and Vimeo Embeds
Audio
Soundcloud or Mixcloud Embeds
Image
Photo or GIF
Gif
GIF format